Mo yeddi moritaninaagal am mi yedda ɗum

Fulɓe mbiyi : « artir jabbere ma yahjii »

Ɓaleeɓe koɗii e leydi Moritani duuɓi ujjunnaaje ko adii Diine Islaam ina ara e nder leydi Ganngari.

Safalɓe (aarabeeɓe tawa hardaneeɓe ngalaa heen) ngarii naatii bannge rewo ceɓɓitiiɗo leydi Ganngari hedde duuɓi teemidannde 8 min njaɓii.

Ɓe njokkii jippogol maɓɓe haa worgo mayri hedde teemidannde 14 kadi min kaalaani.

Ɓe ndahii ɓesnguuji amen haa ɓe mbaɗi ɗum en e kiiɓal hardanaagu kadi min muñii.

Ɓe ngittiiɓe e limoore amen ɓe mbatti ɗum en e nde maɓɓe aarabeeɓe kadi min njeddaani.

Ɓe ɗawii min liggeyaaji e ñamaale njeeygu e faggudu e jaŋde e pinal e daartol fof min njaɓtori.

Ɓe njaɓɓi ɗe amen kono ngal maɓɓe ɓe mawnini ɗuum ne min ndeƴƴii.

Ɓe njawnoraama ɗum ɓe mbari kadi ɓe taccini hay rewɓe ɓe ngonndi ngam momtude e hoynude ɗum fof min muumɗi.

Ɓe panndini jeyiiji maɓɓe keɓtaaɗi e ɗi amen leyɗeele ɓe korkiti min njamɗini.

Ɓe mbonni inɗe e jettooɗe e kaayitaaji amen min ɗali kadi min moosi.

Ɓe ngaddi bone jooni njooni, binndital melsito seeɗa joginooɗo kaayitaaji etee heddiiɓe ni ko haɗanooɓe walla ɗi mum en ko logginooɗi etee gite e min puttini.

Banndiraaɓe, fulɓe mbiyiino : « Gertogel kes ». Mbete jooni eɗen poti laaɓndaade ɓe ɗo holi ko ɓe njiɗi ? jaabowol am ko ngal laaɓndal diwaama. Ngati en mbiyii : « ko ɓuuti hollirii ». Ɓe nimsaani ko ɓenni. Fiɗnde mum ko haɗi e maɓɓe ɓe mbelaaka ɗum haalde. Yimɓe e maɓɓe joom doole en e ɗowɓe e maɓɓe lanndaaji ko haɗi ɗum en haalde haa nanee. Wonaa ngola laawol ɓe mbiyanooma eɓe mbelaa ngam ɓe kaalaani ɓe njeddi. Eywa jooni noon ?

Gila lannda AJD/MR aybini ñalnde 19/06/2011 hol to keddiiɗi ɗi ngoni ? haa teeŋti ɗi ɓi ɗowi ɗi. Won haalka jooni 12/07/2011 ko fayti he kaaltidal mum he laamu, kono haa jooni memoraani heen, saytoraani heen ko men ko. Peert-en gite men. Ceert-en e ɗoyngol jamma niɓɓo weetii. Fulɓe mbiyi : « Jabban am jabbataa hollalde ». Ngummo-ɗen he joɗnde.

Gooto kala to nder leydi yo yamir lannda mum e mawɗo lannda mum so dillaani yo dillu. Gooto kala to caggal leydi yo seppu kadi yo noddu koreeji mum yo mballu sukaaɓe men seppooɓe ɓe seppude, yo ɓe njantu e maɓɓe haa teeŋti wiyeeɓe « yontaaɓe » toon ɓe. Kala lannda ka dillaani walla « jontaaɗo » mo dillaani so toɗɗe ngarii yo wedde moccooɗe ñolɗe haa sicca luuɓa nannda e lukunte, haa metta heedtude he henndu. Gooto kala oto ko laaɓndii lannda mum walla mawɗo lannda mum walla jontaaɗo mum so wonaa yo binndital ngal darto haa reftinee laawol. Oto mbiyee yo feewnite, alaa ko yo darto mbaɗt-en laaɓaani.

Ee hey ma capaato moƴƴo mo ɗum hawranaani so aɗa waawi ndilla koy. Jooni e ndeen jiidaa, guli nattii. Dingiral bawɗi wontii ndoondi. Kala liɓaaɗo waawaa wulde. Kala dilluɗo « enteernet » majjintaa, maaynataa. Kadi paamee ɓe waɗooɓe ɗum njiɗaa Moritani kadi njeyaaka e Moritani. Joom mum en ngari tan ko bonnude ndoga njaha laabi mum en. Onon safalɓe moritaninaaɓe ko ɓesnguuji mon ɓe ngoni he bonnan’de. Ndeke holi ko haɗi on dillude ? Pammineeɓe moritaninaagal ɓaleeɓe hecci garal Islaam e laamu Ganngari kala.


Ñalnde 16/07/2011
SammbaCooyel BAH